Çfarë fshihet pas tenderit për trajtimin e qenve endacakë në Mitrovicë? (VIDEO)
20.05.2026 19:22
Tenderi për trajtimin e qenve endacakë në Mitrovicë është shndërruar në një sagë të gjatë ankesash, përplasjesh institucionale dhe dyshimesh për favorizim në prokurim publik.
Gjithçka nisi në prill të vitit 2025, kur Komuna e Mitrovicës hapi tenderin 400 mijë eurosh për trajtimin e qenve endacakë, me kritere që operatorët ekonomikë i konsideruan diskriminuese. Kompania “Mitro Vet” kundërshtoi kërkesat për qarkullim financiar prej 300 mijë eurosh, kontrata të ngjashme dhe strehimore me kapacitet minimal prej 100 qenve, duke pretenduar se ato kufizonin konkurrencën dhe favorizonin operatorë të caktuar.
Pas ankesës në Organin Shqyrtues të Prokurimit, i njëjti i dha pjesërisht të drejtë kompanisë, duke konstatuar se disa kritere ishin të ekzagjeruara dhe jo në përputhje me konkurrencën e lirë. Tenderi u pezullua, ndërsa më pas Komuna e Mitrovicës e anuloi procedurën me arsyetimin se nuk kishte mjete të mjaftueshme buxhetore.
Por në vitin 2026, procedura u rikthye përmes një ritenderimi prej 300 mijë eurosh, duke hapur një tjetër përplasje mes Komunës së Mitrovicës, Agjencisë së Ushqimit dhe Veterinarisë dhe operatorit ekonomik “Mitro Vet”.
Kësaj here, problemi kryesor u bë licenca e strehimores për qen. “Mitro Vet” pretendon se AUV nuk ia kishte përfshirë në licencë kapacitetin e strehimores, ani pse sipas Udhëzimit Administrativ dhe një shkrese të drejtorit të AUV-së, Sadik Heta, ky element duhej të ishte pjesë e vendimit. Për shkak të mungesës së këtij detaji, kompania pretendon se iu pamundësua pjesëmarrja në tender.
Ironikisht, sipas procesverbaleve të inspektorëve të AUV-it, strehimorja e “Mitro Vet” kishte kapacitet për 350 qen, disa fish më shumë se minimumi i kërkuar prej 100 qenve.
Pas përjashtimit të “Mitro Vet”, në garë mbeti vetëm grupi i operatorëve “Veterinaria” dhe “Adopt Animals”, me pronarë Avni dhe Blendor Kadriu. Kompania u ankua sërish për procedurën në OShP, duke pretenduar se Komuna e Mitrovicës kishte lënë vetëm 24 orë afat për dorëzim ofertash pas vendimit të OShP-së, duke pamundësuar konkurrencë reale.
Në përgjigjen për Kiks Kosovën, Komuna e Mitrovicës arsyetoi anulimin e tenderit të parë me mungesë të mjeteve buxhetore, ndërsa për kriteret e ritenderimit tha se ato janë vendosur në funksion të garantimit të cilësisë së shërbimit dhe interesit publik. Komuna mbrojti edhe afatin prej 24 orësh për ofertim, duke pretenduar se operatorët ekonomikë kishin qenë të njoftuar paraprakisht me dokumentacionin e tenderit.
Ndërkohë, AUV konfirmoi se në Kosovë janë 21 strehimore të licencuara, por vetëm njëra prej tyre e ka të përfshirë në vendim numrin e kafazeve, ndërsa te 20 të tjerat ky element figuron vetëm në procesverbale dhe dokumente inspektimi.
Aktualisht, ankesa e fundit vazhdon të shqyrtohet në OShP, ndërsa saga e tenderit për qentë endacakë vazhdon të shoqërohet me dyshime për trajtim të pabarabartë, procedura të kontestuara dhe mungesë të konkurrencës reale.
E derisa institucionet vazhdojnë betejën me ankesa, vendime e interpretime ligjore, qentë endacakë vazhdojnë të mbeten në rrugët e Mitrovicës.
Ndiqni në vijim kronikat e përgatitura nga Kiks Kosova për këtë çështje:
Ndiqeni emisionin e plotë:
