Krizat zakonisht godasin xhepin e qytetarëve. Por për disa kompani, ato duket se shndërrohen në rast për të rritur fitimet. Dokumentet e siguruara nga Veriu.info tregojnë se “Al Petrol” është zënë dy herë duke shkelur rregullat për çmimet e derivateve të naftës.
Inspektorati Qendror i Mbikëqyrjes së Tregut i Ministrisë së Tregtisë ka nisur dy lëndë për në Gjykatën Themelore në Prishtinë kundër kompanisë “Al Petrol” me pronar biznesmenin Shaip Mikullovci.
Veriu.info ka siguruar shkresat për fillim të procedurës kundërvajtëse dhe procesverbalet e lëndëve, të nxjerra pas inspektimeve të kryera në këtë kompani nga inspektorët e IQMT-së, të cilët kanë konstatuar se “Al Petrol” ka shkelur Ligjin për Tregtinë me Produkte të Naftës.
Lexoni edhe:
Me procesverbalin e datës 24 mars 2026, inspektorët e tregut kanë konstatuar se “Al Petrol” Sh.P.K. ka shkelur marzhën tregtare maksimale të lejuar për shitje me pakicë për dizel e benzinë.
Për shkak të kësaj shkelje ligjore, Inspektorati Qendror i Mbikëqyrjes së Tregut më 8 prill 2026 ka nisur procedurë kundërvajtëse në Gjykatën Themelore në Prishtinë ndaj “Al Petrol” të Shaip Mikullovcit.
E njëjta kompani del të jetë recidiviste e abuzimit me çmime në kohë krize, duke mos respektuar vendimet e organeve shtetërore për çmim maksimal të shitjes së derivateve të naftës. Kjo pasi që edhe vitin e kaluar “Al Petrol” ishte zënë duke bërë tejkalim të çmimit maksimal të shitjes me pakicë të produkteve të naftës.
Më 14 janar 2025 inspektorët e tregut kishin inspektuar këtë kompani, ku pas gjetjeve të shkeljeve ligjore me shitje të naftës, kishin nisur procedurë kundërvajtëse pranë Gjykatës Themelore në Prishtinë – Divizioni Lipjan.
Ndryshe, 100% të aksioneve në kompaninë “Al Petrol” Sh.P.K. i zotëron kompania CDI -Kosovo L.L.C., ku në këtë të fundit Shaip Mikullovci është pronar i 93% të aksioneve, kurse Ylber Kuraja me 7%.
LEXONI EDHE:
Buzhala: A është Shaip Mikullovci i IP Petrol-it, Interex-it e Emonës, oligarku i Albin Kurtit
