Tifozët e Interit po qëndrojnë me zemër të ngrirë. Gjatë orëve të fundit, nga Spanja kanë ardhur raportime për një lëvizje të mundshme të Barcelonës për Lautaro Martinez, veçanërisht nëse përpjekja për të transferuar Julian Alvarezin nuk realizohet.
Kjo çështje ka zgjatur prej disa javësh dhe Atletico Madridi i ka refuzuar vazhdimisht ofertat, duke e kërkuar pagesën e klauzolës së lirimit.
Siç raporton eksperti i transfereve, Fabrizio Romano në YouTube, megjithatë, Interi dhe njerëzit pranë lojtarit mbeten shumë të qetë, përcjell “Gazeta Express”.
Deco është takuar me menaxherin e Lautaros, Alejandro Camano, edhe për faktin se ky i fundit menaxhon edhe futbollistë të tjerë dhe vepron si ndërmjetës për ta.
Dy klubet kanë shkëmbyer pikëpamje, por për momentin pa asnjë rezultat konkret, edhe për faktin se për Interin është shumë e vështirë të heqë dorë nga kapiteni i tij në mes të muajit gusht.
Megjithatë, Barcelona po e shqyrton mundësinë për ta bërë një lëvizje për “Toron”, një futbollist që e ka ndjekur edhe në të kaluarën.
Situata me Julian Alvarez është aktualisht në ngërç dhe Barcelona po kërkon t’ia japë trajnerit Hansi Flick një përforcim të madh në repartin ofanziv, i cili e ka humbur Robert Lewandowskin, që është transferuar në MLS, ndërsa pritet ta humbasë edhe Ferran Torresin, i cili është pranë transferimit te PSG-ja.
Për momentin, Interi nuk ka ndërmend të privohet nga kapiteni i tij dhe në Milano e mohojnë mundësinë e një shitjeje të Lautaro Martinezit.
