Siguria ushqimore është kthyer në një problem i madh, pasi që vazhdimisht zbulohen raste të produkteve të kontaminuara, ku më të ndjeshme janë zakonisht rastet që kanë të bëjnë me produktet e qumështit.
Veriu.info ka siguruar disa dokumente të inspektimeve që kanë kryer inspektorët e Agjencisë së Ushqimit dhe Veterinarisë në Qumështoren Rugove, ku është gjetur djathë i kontaminuar me bakterin e rrezikshëm Escherichia coli (E. coli). Çuditërisht kësaj qumështoreje nga AUV i është lejuar që 200 kilogramë djathë të kontaminuar me E. Coli t’i ripërpunojë në gjizë dhe të njëjtën ta hedh në treg.
Në procesverbalin e siguruar nga Veriu.info që mban datë 10.02.2026 është konstatuar se pas analizave të bëra djathi në paketime 400 gr. ka rezultuar pozitiv (i pakënaqshëm) në E. Coli, me ç’rast Qumështorja Rugove është obliguar këtë djath mos të hedh në treg dhe t’i marrë masat korrigjuese në gjithë procesin e prodhimit të djathit.
Me këtë procesverbal të inspektorëve të AUV-it, Qumështorja Rugove është urdhëruar të gjejë dhe eliminojë problemin që ka shkaktuar këtë kontaminim.
Të nesërmen, më 11.02.2026, Qumështorja Rugove ka bërë kërkesë në zyrën regjionale të AUV në Pejë që t’i lejohet riprodhimi i djathit dhe të njëjtit t’ia ndërrojë destinimin në gjizë, duke pretenduar se djathi i kontaminuar kur kthehet në gjizë i humb efektet e bakterit E. coli.
Pas disa analizave të bëra, AUV i ka lejuar Qumështores Rugove në muajin mars të bëjë ndërrimin e destinimit të djathit në gjizë dhe të njëjtin ta hedh në treg.
Nga dokumentet e siguruara nga Veriu.info, shihet se Qumështorja Rugove nuk ka gjetur shkakun e saktë të kontaminimit të djathit me bakterin E. coli, por vetëm ka supozuar se shkaku mund të jetë puna gjatë vikendit për të cilin proces ka thënë se nuk kishte mbikëqyrje të mjaftueshme.
Në lidhje me këtë çështje, Veriu.info ka marrë qëndrimin edhe të Qumështores Rugove, ku menaxherja e cilësisë dhe kualitetit ka thënë se djathi që ka rezultuar me nivel të pakënaqshëm për kriterin higjienik të E. coli, pas lejimit dhe nën mbikëqyrjen e AUV, është ri-destinuar në produktin gjizë dhe është hedhur në treg me leje të AUV.
Me rastin e paraqitjes së kërkesës për ndërrim destinimi në gjizë, Qumështorja Rugove në kërkesë është thirrur në të dhëna shkencore të publikuara në National Library of Medicine, që sipas tyre, e lejojnë këtë proces. Por në pyetjen se a ka praktikë të tillë që është e publikuar në European Food Safety Authority (EFSA), e cila është kompetente për vendet e BE-së, Melisa Bruqi nga Qumështorja Rugove nuk ka mundur ta konfirmojë, duke thënë: “Referencat shkencore të përdorura tregojnë raste të ngjashme të reduktimit të mikroorganizmave përmes trajtimit termik. Publikimi në National Library of Medicine nuk nënkupton domosdoshmërisht që studimet janë kryer në SHBA. Për më tepër, këto referenca kanë qenë mbështetëse, pasi vendimi është bazuar në ekspertizën profesionale të stafit tonë dhe në analizat laboratorike. Qumështorja Rugove posedon laborator të brendshëm mikrobiologjik dhe bashkëpunon me laboratorë të licencuar të jashtëm.”
Duke analizuar kërkesat që Qumështorja Rugove i ka bërë AUV-it për lejim të ridestinimit të djathit të kontaminuar, kemi gjetur dy linqe të ueb faqeve që kjo qumështore iu ka referuar (Pubmed.ncbi.nlm.nih.gov/24342684 dhe Pubmed.ncbi.nlm.nih.gov/12535124), por aty nuk kemi gjetur se ndonjë në mënyrë të qartë dhe definitive që shpjegon rastin e djathit të kontaminuar me E. Coli dhe lejimit që atij t’i ndërrohet destinimi. Në lidhje me këtë kemi pyetur Qumështoren Rugove, ku menaxherja Bruqi në përgjigje ka thënë: “Referencat nuk duhet të jenë identike 100% me rastin tonë, por të kenë ngjashmëri në elementet kyçe: produkti (djathi), mikroorganizmi (E. coli) dhe metoda e reduktimit (trajtim termik).”
Në pyetjen se a e kanë gjetur shkakun si pasojë e të cilit ka ndodhur kontaminimi i djathit me bakterin E. Coli, menaxherja Bruqi ka thënë se e kanë identifikuar shkakun, por që pas analizimit të dokumenteve ka dalë se kjo është e pavërtetë.
“Po. Përmes sistemit të gjurmueshmërisë (traceability), kemi identifikuar shkakun, kemi ndërmarrë masa korrigjuese dhe kemi verifikuar eliminimin e problemit përmes analizave laboratorike (të brendshme, të kontraktuara dhe nga AUV)”, thuhet në përgjigjen e menaxheres së Qumështores Rugove.
Veriu.info ka kërkuar sqarime shtesë nga Qumështorja Rugove në lidhje me gjetjen e shkakut, pasi që në shkresën e datës 28.02.2026 vetë i kanë kthyer AUV-ut përgjigje me të cilën vetëm kanë hamendësuar se cili mund të jetë shkaku, por që nuk kemi marrë përgjigje.
“Sipas ekipës sonë profesionale dhe me ndihmën e procedurave të gjurmueshmërist kemi konstatuar që lloti kritik ka kortespodencë me (palim djathi) në ditë vikendi e diel 18.01.2026. Pa dashje në këto ditë vikendi ekipa e cila palon djath nuk monitorohet për punën që e bënë dhe për zbatimin e proceduarave te pastrimit dhe dezinfektimit., Po supozojmë qe problemi na ka ardh nga higjinera e ulët e personelit e cila atë ditë ka qenë pa mbikëqyrje”, thuhet në këtë shkresë të siguruar Veriu.info.
Qumështorja Rugove dhe RUGOVE Sh.P.K.
Në ueb faqen e kompanisë RUGOVE shkruan se është themeluar në vitin 2006, edhe pse në regjistrin e ARBK-së figuron e regjistruar në vitin 2008.
RUGOVE Sh.P.K. është në pronësi të biznesmenit Visar Kelmendi.
Produktet RUGOVE Sh.P.K. janë: Ujë Rugove, Djath Rugove, Schmand Rugove, Kos i kulluar, Kos i freskët, Jogurt i freskët, Ajran i freskët dhe Qumësht i freskët.
Ndryshe, vitin e kaluar ishte raportuar në media se Ujë Rugove ishte zhytur në një skandal në Maqedoninë e Veriut, për shkak se ishin gjetur bakteria kolifoirm në mostrat e ujit.
LEXONI EDHE:
Skandal: Zbulohen produkte të kontaminuara me baktere të rrezikshme në Qumështoren KABI (Dokument)
