Pas publikimit të dokumenteve të para për UFO-t nga Pentagoni, interesimi dhe presioni i publikut është shtuar shumë, ndërsa raportohet se do të ketë edhe publikime të tjera të dosjeve sekrete lidhur me objektet fluturuese të paidentifikuara (UFO), transmeton Periskopi.
Një video ushtarake që pretendohet se tregon një “UFO në formë ylli” është rikthyer në qendër të vëmendjes në internet, ndërsa qeveria amerikane po përgatit një tjetër seri dokumentesh për publikim.
Sipas raportit, kanë kaluar dy javë që kur Pentagon publikoi grupin e parë të dosjeve për UFO-t (të njohura edhe si UAP – fenomene ajrore të paidentifikuara), që përfshinin imazhe dhe raporte për objekte të pashpjegueshme.
Publiku dhe disa ligjvënës po kërkojnë më shumë transparencë, duke besuar se qeveria ka mbajtur informacion të fshehtë për vite me radhë.
Në përgjigje, Departamenti i Mbrojtjes i SHBA-së ka konfirmuar se po përgatit publikimin e një grupi të dytë dokumentesh. Zëdhënësi Sean Parnell tha se më shumë materiale të deklasifikuara janë “në proces aktiv për publikim” dhe pritet të dalin “shumë shpejt”.
Ky njoftim vjen pas publikimeve të mëparshme që synonin të rrisnin transparencën mbi monitorimin historik të fenomeneve ajrore të pashpjegueshme.
Eric Burlison ka qenë një nga figurat që po udhëheq kërkesat për hetime. Ai tha në një intervistë se disa qendra kërkimore të financuara nga shteti, si MIT Lincoln Laboratory dhe RAND Corporation, mund të kenë të dhëna të rëndësishme për këto fenomene.
Ai argumentoi se këto institucione kanë mision afatgjatë kërkimor për projekte të qeverisë amerikane dhe mund të jenë vendet ku ruhen të dhëna të klasifikuara ose të arkivuara për UAP.
