Veriu.info më 18 prill ka raportuar për ndërprerje të punimeve të kompanisë Xani në Bair të Mitrovicës, gjatë inspektimeve të kryera nga inspektorët e Inspektoratit të Punës në kuadër të një aksioni nacional.
Pas reagimit të përfaqësuesit të kompanisë Xani Excluzive Building, Veriu.info kishte tërhequr artikullin dhe në të njëjtin link kishte vendosur reagimin e tyre, me sqarimin se detajet për rastin do të jepen pas sigurimit të dokumentacionit në mënyrë zyrtare nga Inspektorati i Punës.
Reagim nga Xani Exclusive Building: Nuk na janë ndërprerë punimet nga Inspektorati i Punës
Gjatë këtij raportimi Veriu.info ka raportuar se punimet janë ndërprerë në objektin e investitorit Xani Excluzive Building me pronar Osman Xani, por që në fakt punimet janë ndërprerë përkohësisht në objektin e investitorit Xani Invest Group me pronar Bahri Xani, vëllait të Osmanit.
Për këtë gabim teknik të paqëllimshëm, Veriu.info i kërkon ndjesë Osman Xanit, për shkak se kemi ngatërruar objektin e tij më të vëllaut të tij që gjenden ngjitur.
Pra, krejt gabimi teknik ka ndodhur pasi që vëllzërit Osman dhe Bahri Xani ndërtojnë në të njëjtin vend, duke mos pasur prona të tjera në mes, gjë që në shikim shihet si ndërtim i përbashkët.
Veriu.info nga Inspektorati i punës ka siguruar shkresat e lëndëve të këtyre inspektimeve, ku shihet se inspektorët e Inspektoratit të Punës, megjithatë kanë gjetur shumë shkelje në vendpunishten e investitorit Osman Xani, për të cilat vërejtje i është shqiptuar punëkryerësit Mali-R Sh.P.K.
Në raportim zyrtar të inspektorëve të punës të hartuar pas inspektimin e vendpunishtes të investitorit Xani Excluzive Building, kompanisë punëkryerëse Mali-R Sh.P.K. me pronar Shyqiri Mustafa i është dhënë 3 ditë afat për përmirësimin e shkeljeve që i janë gjetur.
Sipas raportimit, në këtë vendpunishte janë evidentuar një ‘mal’ me shkelje:
- Ashensorët janë të rrethuar jo të nivelit të lejuar,
- Pjesërisht janë të vendosur parmakët në shkallë të betonit,
- Hapësirat e jashtme nuk janë të rrethuar si duhet,
- Nuk ka prezantuar certifikata trajnimi për punëtorët për siguri dhe shëndet në punë
- Nuk posedon certifikata mjekësore për punëtorët
Pra, kompania Mali-R Sh.P.K. që po kryente punimet në vendpunishten e investorit Xani Excluzive Building me pronar Osman Xani nuk ka mbyllur hapësirat e ashensorëve si duhet, nuk ka vendosur në gjithë hapësirën parmakë në shkallë të betonit, nuk ka mbyllur si duhet hapësirat e jashtme, nuk ka prezantuar certifikata trajtinimi të punëtorëve për siguri dhe shëndet në punë dhe nuk ka poseduar certifikata mjekësore të punëtorëve.
Është e çuditshme se si përkundër këtyre shkeljeve të mëdha, inspektorët e punës kanë lejuar vazhdimin e punimeve, duke ditur se punëtorët e pa trajnuar dhe pa certifikata mjekësore, mund të rrezikojnë seriozisht shëndetin e tyre.
Nga të dhënat publike që gjenden në Agjencinë për Regjistrimin e Bizneseve, Osman Xani figuron si pronar më 100% të aksioneve në Xani Excluzive Building, ndërsa Bordi i kësaj kompanie përbëhet nga: Osman Xani, Nazmi Xani, Hysni Xani dhe Bahri Xani, ky i fundit vëllai i Osmani dhe pronar i Xani Invest Group, kompanisë që inspektorati i ndërpreu punimet.
Më poshtë gjeni pamje nga vendpunishtet e Xani Excluzive Building dhe Xani Invest Group:
