Autoritetet e Varenës, një prej fshatrave më të njohur turistikë në brigjet e Liqenit të Komos në Itali, kanë vendosur masa të reja për të frenuar sjelljet e papërshtatshme të vizitorëve dhe për të mbrojtur cilësinë e jetës së banorëve.
Sipas rregullave të reja, turistët që ecin nëpër rrugët e fshatit pa bluzë ose vetëm me rroba banje jashtë zonave të plazhit do të gjobiten me shuma nga 50 deri në 200 euro.
Lëvizja me këtë veshje do të lejohet vetëm në plazhet e liqenit dhe gjatë udhëtimeve me varkë.
Varena, me rreth 650 banorë të përhershëm, përballet çdo vit me një numër gjithnjë e më të madh turistësh. Për këtë arsye, bashkia ka vendosur edhe kufizime të tjera, duke lejuar grupet turistike të organizuara me maksimumi 25 persona dhe duke ndaluar përdorimin e altoparlantëve nga guidat turistike, në mënyrë që të shmanget mbipopullimi dhe zhurma në rrugicat karakteristike të fshatit.
Kryebashkiaku Mauro Manzoni deklaroi se, megjithëse Varena mirëpret qindra mijëra vizitorë çdo vit, mirëqenia e banorëve nuk mund të sakrifikohet për shkak të turizmit masiv.
Masat janë mirëpritur edhe nga banorët vendas. Një pronar dyqani u shpreh se vizitorët mund të vishen si të dëshirojnë në plazh, por kur lëvizin nëpër fshat, hyjnë në dyqane, restorante, kisha apo sheshe publike, duhet të respektojnë një kod të përshtatshëm veshjeje.
Varena nuk është destinacioni i vetëm italian që po vendos rregulla më të rrepta për turistët. Vitet e fundit, disa qytete dhe fshatra në Itali kanë ndërmarrë masa për të menaxhuar pasojat e turizmit të tepërt. Në vitin 2022, Sorrento vendosi gjoba për personat që lëviznin në qendër me rroba banje ose pa bluzë, ndërsa në vitin 2023 Portofino kufizoi qëndrimin në zona të caktuara dhe vendosi masa për të reduktuar grumbullimet e turistëve.
