Kryetari i Aleancës për Ardhmërinë e Kosovës, Ramush Haradinaj ka reaguar pas deklaratës së ambasadorit amerikan, Jeff Hovenier i cili ka pasur një mesazh të qartë për Qeverinë e Kosovës: “Nëse dëshiron t’i bashkohesh një klubi, mos urino në derën e klubit” .
Haradinaj përmes një shkrimi në rrjetin social Facebook, ka përmendur se Hovenier njihet si një top diplomat.
“Ambasadori Amerikan Jeffrey Hovenier ka qenë i kyqur në temën e Kosovës që nga lufta çlirimtare e popullit tonë e posaçërisht gjatë negociatave nën udhëheqjen e Marti Ahtisaarit. Ambasadori Hovenier shquhet si njeri me vlera të larta njerëzore, top diplomat me një urtësi të madhe politike, njerëzore dhe intelektuale. Ai ka gjithmonë fjalë të përzgjedhura dhe ka një dashuri të madhe për Kosovën dhe popullin e saj”.
Tutje, Haradinaj ka shkruar se shprehja e pazakontë e Hovenier ka ardhur si shkak i dhimbjes dhe pakënaqësisë së rrugës së Kosovës.
Në fund, ai ka thënë: “Këmbanat po bien për të gjithë ata që kanë vesh”.
“Shprehja e tij “mos urinoni nga klubi ku doni të hyni” është shprehje shumë e pazakontë e tij. Kjo shprehje e pazakontë është shprehje e dhimbjes dhe pakënaqësisë për kursin dhe rrugën e gabuar që ka përzgjedhur Kosova. Njerëzve që e duan Kosovën si Hovenier kjo ju dhemb. Kosova është keq dhe ka trend të përkeqësimit. Këmbanat po bien për të gjithë ata që kanë vesh!” – ka thënë kreu i AAK-së.
