Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin institucioni privat shëndetësor “Akel Clinic L.L.C.”, Ambulancë Specialistike Dermatologjike me themelues Mustafa Akel është gjobitur me 2 mijë euro për shkelje të Ligjit për Shëndetësi.
Në arsyetimin e vendimit të siguruar nga Veriu.info, thuhet se qëllimi i inspektimit kishte të bënte me verifikimin e vendimit për pezullimin e veprimtarisë shëndetësore të “Akel Clinic”, që operon në rrugën ‘Ahmet Krasniqi’ në Prishtinë.
“Inspektimi u zhvillua në prani të Znj. Vineta Zhushi – Baçelor i Shkencave në Infermieri. Na u prezantua licenca valide e institucionit dhe licenca valide e Znj. Vineta Zhushi – Baçelor i Shkencave në Infermieri. Institucioni ishte i licencuar me Nr. 154/2025 valide deri me datë 23.04.2030. Në kohën e inspektimit IPSH “Akel Clinic L.L.C”, Ambulancë Specialistike e Dermatologjisë ishte i hapur dhe ofroheshin shërbime shëndetësore. Shërbimet shëndetësore ofroheshin nga Znj. Vineta Zhushi – Baçelor i Shkencave në Infermieri, e cila nuk figuronte e lajmëruar në DLA-MSH. Në kohën e inspektimit Znj. Vineta Zhushi ishte duke ofruar shërbim shëndetësor, trajtim me PRP tek me iniciale S.C.”, thuhet në vendim.
Pra, përkundër që veprimtaria shëndetësore e “Akel Clinic” ishte pezulluar, ky institucion shëndetësor vazhdonte kundërligjshëm veprimtarinë, madje edhe me staf shëndetësor të kundërligjshëm, pasi që Vineta Zhushi nuk ishte lajmëruar e as licencuar në Divizionin për Licencim dhe Akreditim të Ministrisë së Shëndetësisë.
Përkundër këtyre shkeljeve flagrante dhe refuzimit të zbatimit të vendimeve të institucioneve shtetërore të Kosovës nga klinika e turkut Mustafa Akel, “Akel Clinic” është gjobitur vetëm me 2 mijë euro Inspektorati Shëndetësor.
Në vendimin e siguruar nga Veriu.info nuk shkruan se kësaj klinike t’i jenë vendosur shiritat e ndërprerjes së veprimtarisë.
Veriu.info ka tentuar të marrë një qëndrim nga “Akel Clinic L.L.C.” për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
Kush është “Akel Clinic L.L.C.”?
“Akel Clinic” është kompani e themeluar në Kosovë në vitin 2024 si Shoqëri me Përgjegjësi të Kufizuar nga shtetasi turk Mustafa Akel, i cili zotëron 100% të aksioneve në këtë kompani.
Për dallim nga dokumentet zyrtare të Ministrisë së Shën detësisë, ku shkruan se themelues i kësaj klinike është Mustafa Akel, në ueb-faqe e “Akel Clinic” shkruan se themeluese është Dr. Gönül Kiracı. Nga kjo mund të konkludohet se “Akel Clinic” ose ka bërë deklarim të rrejshëm nga organet e shtetit, ose po deklaron rrejshëm themeluesin e insitutcionit në ueb-faqe.
Aktivitet kryesor biznesor kjo klinikë ka të regjistruar aktivitetet e mjekësisë së specializuar, ndërsa si aktivitet dytësor në ARBK ka të lajmëruar aktivitetet e tjera të shëndetit të njeriut.
Në realitet “Akel Clinic” kryesisht merret me transplant të flokëve, ndërsa në ueb-faqen e kompanisë shkruan se ofron edhe shërbime estetike shëndetësore Botox, produkt ky që nuk ka licencë nga asnjë kompani të hyjë ne tregun e Kosovës, e rrjedhimisht as ligjërisht nuk mund të injektohet te pacientët.
LEXONI EDHE:
