Gazetari Lirim Mehmetaj ka reaguar ndaj deputetit të pushtetit, Fatos Geci, i cili, sipas tij, ka bërë të ditur se është ankuar në polici për të. Mehmetaj thotë se ky veprim vjen vetëm pasi rasti ka marrë përmasa publike, ndërsa kritikon atë që e konsideron si përpjekje për t’i zgjidhur përplasjet përmes policisë.
Në reagimin e tij, Mehmetaj thekson se, po të besonte vërtet në rrugët institucionale, Geci nuk do të lejonte që familjarë të tij të shkonin në zyrën e gazetarit, por do t’i udhëzonte që çështjet të zgjidheshin përmes institucioneve.
Ai pretendon se deputeti iu drejtua policisë vetëm pasi ngjarja u bë publike, duke e cilësuar këtë si shenjë të mungesës së respektit për institucionet shtetërore.
Mehmetaj rikujton se, në një shtet demokratik, askush nuk duhet të përballet me policinë vetëm për shkak të një opinioni. Sipas tij, nëse Geci konsideron se në postimin e gazetarit ka elemente të shpifjes apo fyerjes, rruga e duhur është padia në gjykatë.
Postimi i plotë i Mehmetajt:
Deputeti i pushtetit Fatos Geci paska shkruar se është ankuar për mua në polici, duke dashur kështu të tregojë se ai i përcjellë rrugët institucionale për të zgjidhur problemet.
Sikur të ishte kështu, nuk do të dërgonte familjarë në zyrën time, madje edhe po të donin ata do t’i ndalonte ky duke iu treguar se këto punë zgjidhen përmes rrugëve institucionale.
E vërteta është se ai ka shkuar në polici vetëm pasi ngjarja i ka marrë përmasat që i ka marrë, duke treguar kështu se ai nuk e respekton as shtetin që vetë partia e tij e udhëheqë.
Përndryshe, nuk mund ta dërgosh askë në polici për opinione. Në shtete demokratike të paktën jo. Njëjtë siç nuk mund ta dërgojë askush Fatos Gecin në polici për atë që ka thënë ai.
Nëse ai beson se ka elemente të shpifjes, apo fyerjes në postimin tim, mund të më paditë për shpifje e fyerje dhe ballafaqohemi në gjykatë.
Koha kur njerëzit dërgohen në burg për opinione ka marrë fund dhe nuk do të lejojmë në asnjë mënyrë që ajo kohë të rikthehet prapë.
