Të paktën 14 persona kanë humbur jetën pasi një tërmet me magnitudë 7.7 goditi Indonezinë të shtunën herët në mëngjes, ka njoftuar agjencia kombëtare për menaxhimin e fatkeqësive.
BPBD bëri të ditur se persona të tjerë kanë mbetur të lënduar në shkallë të ndryshme, duke paralajmëruar se shifrat janë paraprake, ndërsa operacionet e kërkim-shpëtimit vijojnë.
Ekipet po punojnë për të nxjerrë personat që mund të kenë mbetur të bllokuar në ndërtesat e dëmtuara nga tërmeti dhe dhjetëra lëkundjet pasuese. Një paralajmërim për cunami u lëshua pas tërmetit, por u hoq rreth tre orë pas goditjes së parë, raporton BBC, transmeton Gazeta Express.
Tërmeti goditi ishullin Flores pak para orës 05:00 sipas kohës lokale të shtunën. Tërmeti ishte në një thellësi prej 15 kilometrash, bëri të ditur Agjencia e Meteorologjisë, Klimatologjisë dhe Gjeofizikës e Indonezisë.
Sa më i cekët të jetë një tërmet, aq më shkatërruese priren të jenë pasojat e tij në sipërfaqe.
Lëkundje të fuqishme pasuese u ndjenë në të njëjtën zonë, përfshirë një me magnitudë 6.1.
Pamjet e filmuara në portin e Maumeres treguan copa të mëdha betoni që shkëputeshin nga ndërtesa e terminalit dhe binin mbi pasagjerët që prisnin të hipnin në një traget ndërishullor. Disa prej tyre përfunduan në det kur u shemb ura lidhëse me anijen.
Emanuel Melkiades Laka Lena, guvernatori i provincës Nusa Tenggara Lindore, tha në një konferencë për media se viktimat humbën jetën në gjumë, pasi mbi ta u shembën rrënojat.
Pas lëshimit të paralajmërimit për cunami nga autoritetet, njerëz të shumtë u panë duke u larguar drejt zonave të brendshme me motoçikleta. BNPB bëri të ditur se rreth 2,000 persona ishin evakuuar ose ishin zhvendosur me iniciativë të tyre.
Megjithatë, do të duhet kohë për të vlerësuar përmasat e plota të shkatërrimit në rajon, i cili është i largët dhe malor.
BNPB u bëri thirrje njerëzve të qëndrojnë të qetë dhe të largohen nga zonat bregdetare.
“Banorët duhet gjithashtu të shmangin hyrjen në ndërtesa, veçanërisht në ato që tashmë kanë pësuar çarje ose dëmtime strukturore”, tha BNPB.
“Një vlerësim i shpejtë është aktualisht duke u zhvilluar për të përcaktuar numrin e viktimave dhe përmasat e pasojave. Ne do ta bëjmë publike këtë informacion pasi të dhënat të jenë verifikuar.”
