Flota ndërkombëtare e anijeve të nisura drejt Gazës për të shpërndarë një sasi simbolike të ndihmave dhe për ta thyer bllokadën detare izraelite ndaj enklavës palestineze ka thënë se disa barkave të saj u janë afruar anije të paidentifikuara, disa madje duke lundruar pa drita të ndezura.
Në një postim në rrjetin “Telegram”, flota tha se anijet e saj u zhvendosën dhe drejtuesit zbatuan protokolle të sigurisë në pritje të pengimit të mundshëm të lundrimit, shkruan gazeta “The Times of Israel”.
Në një video të publikuar në rrjetin X nga një prej aktivistëve duket se shihet një anije patrulluese e forcave izraelite duke kaluar afër barkave të flotës ndërkombëtare. Në pjesën e përparme të anijes vërehet si dritëhije mitralozi i saj.
“Urgjente!!! Një anije ushtarake izraelite porsa kaloi nga barkat tona duke na frikësuar, duke i dëmtuar sistemet tona të komunikimit dhe duke bërë manovra shumë të rrezikshme me qarkullim përreth barkave tona udhëheqëse, Alma dhe Sirius” – shkroi aktivistja Nancy Abdallah në videon që e publikoi në rrjetin X.
“Pavarësisht humbjes së pajisjeve elektronike, askush nuk është lënduar dhe ne e vazhdojmë shkuarjen për në Gaza për ta thyer rrethimin dhe për të krijuar një korridor humanitar” – shtoi ajo.
Italia dhe Spanja kanë dërguar anije ushtarake për t’i ofruar asistencë flotës ndërkombëtare në rast nevoje, ndërsa të martën u raportua se tre dronë për fluturime të gjata, me prejardhje nga një bazë në Turqi, po e përcillnin lundrimin e flotës.
