Shkelja e Ligjit për Mbrojtjen e të Dhënave Personale nga bizneset që vendosin kamera mbetet një problem shqetësues. Shpesh, sistemet e vëzhgimit instalohen pa respektuar kriteret ligjore dhe pa informuar qytetarët në mënyrë të duhur. Kjo cenon privatësinë dhe rrit nevojën për mbikëqyrje më të rreptë institucionale.
Agjencia për Informim dhe Privatësi (AIP), si agjenci e pavarur përgjegjëse për mbikëqyrjen dhe zbatimin e Ligjit për Mbrojtjen e të Dhënave Personale, ka realizuar një inspektim në Kolegji “Pjetër Budi” lidhur me ligjshmërinë e përpunimit të të dhënave personale përmes sistemit të vëzhgimit me kamerë, raporton Veriu.info.
Inspektorët e AIP kanë gjetur shkelje të Kolegji “Pjetër Budi” lidhur me sistemin e vëzhgimit me kamera që bëhet në këtë institucion të arsimit të lartë.
Pas inspektimit të bërë, është konstatuar se Kolegji “Pjeter Budi” ka përpunuar të dhënat personale përmes 11 kamerave në kundërshtim me nenin 75, paragrafin 2 të LMDhP-së, pasi që i njëjti nuk ka vendosur njoftimin (shenjën paralajmëruese), si dhe në kundërshtim me nenin 76, paragrafin 2 dhe 5, të LMDhP-së, nuk ka nxjerrë vendim për instalimin e sistemit të vëzhgimit me kamerë dhe duke mos i njoftuar në mënyrë të duhur me shkrim personat që punojnë nën vëzhgimin me kamerë.
Veriu.info ka siguruar vendimin e AIP me të cilin është urdhëruar Kolegji “Pjetër Budi” të ndaloj përkohësisht përpunimin e të dhënave personale përmes sistemit të vëzhgimit me kamerë.
Po ashtu Kolegji “Pjetër Budi” të bëjë shkatërrimin e të dhënave të mbledhura përmes sistemit të vëzhgimit me kamerë, përderisa është urdhëruar që brenda 15 ditësh të ndërmarrë veprimet e duhura për zbatimin e vendimit.
Ndryshe, pronar i Kolegjit “Pjetër Budi” është Besim Ajeti që posedon 100% të aksioneve.
LEXONI EDHE:
AIP kap Kolegjin “Tempulli” duke vëzhguar me kamerë kundërligjshëm sallën e testeve (Dokument)
