Drejtoria e Shëndetësisë e Komunës së Mitrovicës tashmë njihet për shumë skandale të bëra nga drejtori me ekipin e zyrtarëve që e udhëheqin, përfshirë skandalin e marrëveshjes me laboratorin “Avicena”, pagesa të kundërligjshme si avans ndaj kompanive për ndërtimin e QMF-ve dhe jo vetëm.
Veriu.info ka zbuluar një skandal se si kjo drejtori e udhëhequr nga Fahri Shabani, po abuzon me pronën komunale të sektorit të shëndetësisë, duke e lënë pas dore deri në thuajse shkatërrim.
Komunat administrojnë më shumë automjete për nevojat e tyre, por për dallim prej sektorëve tjerë që automjetet i shfrytëzojnë kryesisht për udhëtime zyrtare, sektori i shëndetësisë shumicën e automjeteve i ka të destinuara në shërbim të ofrimit të ndihmës për pacientët.
Por Drejtoria e Shëndetësisë e udhëhequr nga Fahri Shabani nuk është se po iu kushton kujdes mirëmbajtjes së automjeteve që shërbejnë në kuadër të Qendrës Kryesore të Mjekësisë Familjare, e të cilat janë në dispozicion të ekipeve mjekësore me qëllim të ofrimit të ndihmës shëndetësore për qytetarët e Mitrovicës.
Veriu.info ka siguruar fotografi të një automjeti (furgoni) të Drejtorisë së Shëndetësisë, respektivisht të QKMF-së së kësaj drejtorie, i cili për shumë muaj apo vite, është duke qendruar në një parking të një restoranti në Vushtrri.
Në fotot e siguruara nga Veriu.info, e të cilat janë realizuar këtë javë, shihet se si furgoni po qendron në parkingun e restorantit “City Grill” në Vushtrri, përreth të cilit ka dalë bari, për shkak të kohës së gjatë të qendrimit aty. Madje, veturës i janë hequr tabelat me qëllim të mos pasjes mundësi të identifikimit se kujt i përket.
Në një përgjigje për Veriu.info, Fevzi Sylejmani, drejtori i QKMF-së së Mitrovicës, e cila operon në kuadër të drejtorisë së Shëndetësisë, ka pranuar se automjeti i përket QKMF-së së Mitrovicës, por nuk është përgjigjur në pyetjen se prej sa kohësh gjendet në Vushtrri në një parking privat ky automjet.
“Automjeti ne fjale i perket QKMF dhe gjendet ne parkingun e Operatorit Ekonomik per mirembajtjen e automjeteve te Parkut Vozites te Komunes. Sipas kontrates korniz tre vjeçare i prezgjedhur nga Zyra e Prokurimit ne Komune”, ka thënë drejtori Sylejmani për Veriu.info, duke lënë të kuptohet se automjeti është defekt.
Edhe përkundër që Veriu.info i prezaton fotografi se automjeti gjendet në një parking privat, pra të një restoranti, drejtori Sylejmani thotë se automjeti gjendet në parkingun e Operatorit Ekonomik për mirëmbajtjen e automjeteve. Nëse këtu nuk është qëllimi i tij t’i shmanget përgjigjes, atëherë kjo lenë të kuptohet se një restorant ka të fituar tenderin për rregullimin e automjeteve, gjë që nuk është e vërtetë.
Veriu.info ka kontaktuar edhe me restorantin “City Grill” në Vushtrri për t’i pyetur se përse një veturë zyrtaree shtetit qendron e parkuar pa tabela për kohë të gjatë në parkingun e tyre, por një punëtorë të këtij restoranti që është prezantuar si menaxhere nuk ka dhënë përgjigje, duke kërkuar që fotot të mos publikohen pasi që është parking privat. E pyetur se për çfarë arsye mbani automjete të shtetit në parking privat për kohë të gjatë dhe a keni autorizim për këtë, ajo nuk ka kthyer përgjigje.
