Një lidhje biznesore del të jetë e zhvilluar mes trafikantit të drogës, Nezir Idrizi dhe binzesmenit polak, Tomasz Tokarski, përmes së cilit u tentua blerja e mallrave për Rezervat Shtetërore.
Nezir Idrizi, i dënuar për trafikim me drogë, e kishte njoftuar Ridvan Muharremin me biznesmenin polak, Tomasz Tokarski, për blerjen e mallrave për Rezverat Shtetërore.
Përveç se e ka mik, Idrizi ka edhe lidhje biznesore me biznesmenin polak, Tomasz Tokarski.
Idrizi e Tokarski janë aksionarë të kompanisë EMCODEX L.L.C.
Sipas të dhënave në Agjencinë e Regjistrimit të Bizneseve të Kosovës (ARBK), kompania EMCODEX L.L.C.. merret me administrimin e tregjeve financiare.
Tomasz Andrzej Tokarski mban 52% të aksioneve, kurse Nezir Idrizi ka rreth 4% të aksioneve, me vlerë prej 100 mijë euro në këtë kompani.
Përpos dyshes Idrizi – Tokarski, aksionarë tjerë në këtë kompani janë edhe dy turq dhe një polak. Bertil Ake Gunnar dhe Slawomir Tadeusz Bober me nga 20% të aksioneve dhe Artur Stefan Gorzelak me 4%.
Nezir Idrizi ia kishte propozuar sekserit Ridvan Muharremi kompaninë e mikut të tij polak, për furnizimin me mall për Rezervat Shtetërore në Ministrinë e Tregtisë, ndërkaq Muharremi më pas kishte ‘aktivizuar’ lidhjet e tij me pushtetarët.
Ani pse e kishte mohuar se ishte bashkëpronar në kompaninë me të cilën edhe është bërë blerja e mallrave për rezervat shtetërore, Neziri kishte thënë se kishte shërbyer vetëm si përkthyes në negociatat mes Qeverisë e kompanisë XANTO KOS, ku pronar është biznesmeni polak Tomasz Tokarski.
“Negociatori” i blerjes së mallrave për Rezervat Shtetërore, Nezir Idrizi, në të vërtetë është një trafikant droge.
Ai është i dënuar me mbi 10 vite burgim për shpërndarjen e drogës në Evropë, e përpos në kontinentin e vjetër, Neziri është marrë me trafikimin e drogës edhe në Kosovë.
Ai ishte shpallur fajtor edhe në Kosovë për trafikim me drogë.
Më 4 shtator të vitit 2014, Neziri ishte dënuar nga Gjykata Themelore në Gjakovë. Vendimi i Themelores ishte bërë i plotfuqishëm më 14 nëntor të 2014-të, ndërkaq Neziri kishte përfunduar në burg. Ai ishte dënuar me 1 vit burgim./Paparaci
