Shkelja e të drejta të punëtorëve nga punëdhënësit ka qenë një problem që e përcjellë Kosovën prej pas luftës, ku në mesin e shkeljeve te gratë shumë herë është theksuar çështja e ndërprerjes së kontratave gjatë kohës së shtatzënisë, kohë kur gratë e punësuara janë të mbrojtura edhe me ligj.
Një rast i tillë ka ndodhur së fundmi në Mitrovicë, ku Qëndresa Mehmeti Hasani është ankuar në redaksinë e Veriu.info, se i është ndërprerë marrëdhënia e punës në mënyrë të kundërligjshme gjatë kohës së shtatzënisë, pretendim të cilin e ka vërtetuar edhe Inspektorati i Punës përmes gjobës të shqiptuar ndaj ish punëdhënësit të saj.
Veriu.info ka siguruar vendimin e Inspektorati i Punës të nxjerrë më 2 korrik 2025 në bazë të ankesës së Qëndresa Mehmeti Hasani, me te cilën shqiptohet masa ndëshkimore prej katër (4) mijë euro ndaj subjektit juridik “Kabil Merovci” B.I. me seli në Mitrovicë, që është zyra noteriale e noterit Kabil Merovci.
Zyra e Noterit Kabil Merovci është gjobitur me tre (3) mijë euro për cenimin e dispozitës së nenit 53 të Ligjit të Punës, i cili ndalon shkëputjen e kontratës gjatë kohës së shtatzënisë. Pra, për ndërprerje të marrëdhënies së punës për Qëndresa Mehmeti Hasani.
Më pesëqind (500) euro është gjobitur për cenim të dispozitës së nenit 20 të Ligjit të Punës, nen i cili përcakton orarin e punës.
Ndërsa, edhe me pesëqind (500) euro tjera është gjobitur për cënim të nenit 71, i cili rregullon kohën e njoftimit për ndërprerjen e kontratës së punës që është 30 ditë për kontrata nga gjashtë (6) muaj deri në (2) vite punësim, 45 ditë për kontrata prej dy (2) deri në dhjetë (10) vite punësimi dhe 60 ditë për kontrata mbi dhjetë (10) vite punësim.
Veriu.info ka kontaktuar me noterin Kabil Merovci të cilin e ka pyetur pse i është ndërprerë marrëdhënia e punës ish punëtores Qëndresa Mehmeti Hasani dhe se a do ta zbatoj vendimin e Inspektoratit të punës.
Në përgjigjen e noterit Kabil Merovci për Veriu.info thotë se nuk i ka ndërprerë kontratë, por sipas tij, e njëjta i ka skaduar.
“Sa i perket pyetjes tuaj te pare ju informoj se Zonjes ne fjale nuk i eshte nderprere kontrata, mirepo te njejtes i ka skaduar, ndersa lidhur me pyetjen e dyte, Ju informoj se jemi ne fazen e ankeses kunder vendimit dhe varesisht prej procedures se ankeses atehere do ti ndermarrin veprimet e nevojshme”, thuhet në përgjigjen e noterit Kabil Merovci për Veriu.info.
Më poshtë gjeni të plotë vendimin e Inspektoratit të Punës:
