Edward Joseph, ligjërues në Universitetin Johns Hopkins në SHBA, tha se Serbia ka përgjegjësi më të madhe për situatën në Kosovë, por edhe kryeministri i Kosovës, Albin Kurti, duhet të tregojë se serbët në Kosovë janë qytetarë të plotë dhe që Qeveria në Prishtinë i respekton dhe i trajton si të tillë.
I pyetur nëse duke pasur parasysh deklaratën se kriza ndërmjet Kosovës dhe Serbisë u sjell përfitim liderëve të të dyja palëve, ai sheh një situatë të ngjashme në Maqedoninë e Veriut, ai tha se nuk e krahason atë, sepse situata në Maqedoninë e Veriut është krejtësisht e ndryshme nga ajo në Kosovë dhe Serbi.
“Serbia dhe Kosova nuk janë njësoj përgjegjëse. Ata nuk janë njësoj përgjegjës për këtë situatë. Serbia refuzon të njohë Kosovën dhe pranon status quo-në për ta mbajtur Kosovën në këtë situatë të pasigurt. Prandaj, Serbia ka përgjegjësi më të madhe për situatën në Kosovë se sa Kosova. Por sigurisht që kryeministri Kurti ka përgjegjësinë e tij. Ai gjithashtu duhet të tregojë se serbët e Kosovës janë në fakt qytetarë të plotë të Kosovës dhe se Qeveria në Prishtinë i respekton dhe i trajton ata si të tillë”, tha Joseph në një intervistë për shërbimin maqedonas të Radio Evropës së Lirë.
I pyetur se si do të ndikojë ndalimi apo vazhdimi i luftës në Ukrainë në situatën e sigurisë në Ballkan, ai thotë se aty sheh pasoja të mëdha.
“Nuk mund ta kemi këtë në rajon. Kjo është ende e paqartë. Ende ka tensione, shikoni mes Kosovës dhe Serbisë, sulmi i fundit terrorist. Madje SHBA-të kanë bërë të ditur se ishte një sulm kriminal dhe i tmerrshëm në Kosovë, i cili kishte për qëllim shkatërrimin e ujësjellësit, i cili ndikon në furnizimin me ujë dhe energji elektrike të gjithë Kosovës. Nga kërcënime të tilla, ne shohim se ka aktorë në rajon, të cilët duan vetëm një sinjal se Rusia është kthyer disi, dhe SHBA-ja dhe BE-ja kapitullojnë, dhe ata bien dakord për një axhendë të ngjashme këtu në rajon, duke pushtuar territore, duke ndarë kufijtë, duke i detyruar njerëzit të lëvizin dhe të minojnë sovranitetin e shteteve, jo vetëm të Kosovës, por edhe të Malit të Zi, Bosnjë-Hercegovinës. Prandaj, do të ishte shumë e rrezikshme të kishim një dorëzim të tillë ndaj Putinit”, shtoi Joseph./REL/
