Erdhi si “shpëtimtar” i klubit të futbollit Vushtrria, por fatkeqësisht ky klub nga momenti kur mori si sponsor biznesmenin Shaip Mikullovci, nuk arriti asnjë rezultat konkret madje duke dështuar edhe të inkuadrohet në superligë.
Veriu.info ka raportuar vazhdimisht për probleme të shumta në menaxhim dhe keqpërdorime të vazhdueshme nga menaxhmenti i klubit, i cili u vendos me “urdhrin” e Shaip Mikullovcit.
Ai filimisht kishte vendosur si kryetar të klubit ish kryetarin e BIK-ut në Vushtrri, Shemdi Rrahimin, i cili më parë kishte qenë edhe punétor i Shaip Mikullovcit në kompaninë e tij Emona Grup. Sikur kjo të mos mjaftonte Mikullovci kishte vendosur në pozitën e drejtorit sportiv, Liridon Ahmetin, dhëndrrin e tij (burrin e motrës).
Rrahimi kritikohej se nuk kishte njohuri për futbollin.
E pikërisht njëri nga ta, kryetari i klubit Shemsi Rrahimi, në Kuvendin e nesërm të FC Vushtrria, do të largohet nga kjo pozitë pas raportimeve të vazhdueshme të Gazetës Online Veriu.info për keqpërdorime në klub.
Veriu.info kishte raportuar për transaksione të dyshimta nga llogaria e FC Vushtrria në xhirollogarinë e një kompanie që merret me hekur e çelik.
Bëhet fjalë për kompaninë “Inter Steel” Sh.P.K., e cila si aktivitet kryesor në Agjencinë e Regjistrimit të Bizneseve ka “Tregtia me shumicë e drurit, materialeve të ndërtimit dhe pajisjeve hidrosanitare”, në llogarinë e së cilës janë transferuar hiq më pak se 130 mijë euro.
Më pas Veriu.info kishte raportuar për pagesa të majme për kryetarin e klubit Shemsi Rrahimi në vlerë prej 1500 euro në muaj, derisa lojëtarët nuk merrnin paga.
Por kjo nuk ishte e hyra e vetme nga FC Vushtrria për familjen e Rrahimit, pasi edhe vajza e tij, Sara Rrahimi, ishte paguar me 2000 euro në emër të shërbimeve ndaj klubit.
E krejt këto raportime kanë bërë që Rrahimi nesër të largohet nga kjo pozitë.
