Siguria ushqimore është kthyer në një problem i madh, pasi që vazhdimisht zbulohen raste të produkteve të kontaminuara, pa afat dhe me probleme të tjera, të cilat rrezikojnë seriozisht shëndetin e konsumatorëve.
Veriu.info ka siguruar dy raporte të testimit të Agjencisë së Ushqimit dhe Veterinarisë, ku nga rezultatet e laboratorit konstatohet se dy produkte të Qumështores KABI në Gjilan kanë rezultuar se janë të kontaminuara me baktere të rrezikshme.
Më 18 dhjetor 2025 është testuar në laborator produkti Jogurt 180 gramë, rezultatet e të cilit kanë dalë të pakënaqshme në kriterin “Enterobaktere”.
Po ashtu rezultate të pakënaqshme kanë dalë edhe për produktin Gjizë 800 gramë në kriterin e Escherichia Coli (E Coli).
Testimi i këtyre produkteve është bërë pas një inspektimi rutinor të realizuar nga inspektorët e AUV-it, raporton Veriu.info.
Pas marrjes së rezultateve të testimit, AUV më 9 janar ka nxjerrë vendim për asgjësimin e këtyre produkteve ushqimore me origjinë shtazore, pasi që është konstatuar se të njëjtat janë të ndaluara për konsum njerëzor.
Më 20 janar është realizuar procedura e asgjësimit të këtyre produkteve nën mbikëqyrjen e inspektorëve të AUV-it, të cilët sipas shkresave të lëndës, shihet se nuk kanë shqiptuar gjobë për këto gjetje të rënda të zbuluara në Qumështoren KABI.
Ndryshe, Qumështorja KABI (KABI Sh.P.K.) është me bazë në Kmetoc të Gjilanit, e themeluar sipas ARBK-së në vitin 2015 me pronarë Mitat Bixhaku dhe Femi Kastrati.
Veriu.info ka tentuar të marrë një qëndrim nga Qumështorja KABI (KABI Sh.P.K.) për zbulimin e produkteve të kontaminuara me baktere të rrezikshme, por deri në momentin e publikimit të artikullit nuk ka pranuar përgjigje për pyetjet e dërguara.
Nuk dihet nëse sasi e këtyre produkteve të kontaminuara me baktere të rrezikshme të jenë hedhur në treg për shitje, pasi që nuk është e specifikuar në shkresa të lëndës nga AUV e as KABI nuk ka kthyer përgjigje./Veriu.info
LEXONI EDHE:
