Përfitimi nga tenderëve publikë dhe as puna pa licencë në Kijevë të Malishevës, duket se nuk janë të mjaftueshme për të përmbushur egon e EX FIS Sh.P.K. të Isa Muharremi, pasi që kjo kompani është kapur duke abuzuar edhe me çmime të derivateve të naftës në kohë krize.
Veriu.info ka siguruar dosjen e lëndës së inspektimit të kryer nga inspektorët e tregut të Ministrisë së Tregtisë dhe inspektorët e ATK-së në një pikë të saj në Fushë Kosovë, ku është zënë duke shitur derivate të naftës me çmime më të larta se sa ato që janë të lejuara me vendim shtetëror në kohë krizë, të cilat përditësohen në baza ditore prej shpërthimit të luftës së ShBA-së e Izraelit me Iranin.
Në procesverbalin e Inspektoratit të Tregut të siguruar nga Veriu.info, shihet se në pikën e EX FIS në Fushë është realizuar një inspektim më datë 6 mars 2026, ku është konstatuar se kjo kompani ka tejkaluar marzhën maksimale të lejuar për shitje të derivateve të naftës.
Për shkak të kësaj shkeljeje të Ligjit për Tregtinë me Produkte të Naftës dhe dëmtimit të konsumatorëve, Inspektorati i Tregut më 23 mars ka filluar procedurën kundërvajtëse ndaj EX FIS pranë Gjykatës Themelore në Prishtinë – Divizioni për Kundërvajtje në Fushë Kosovë.
“Bazuar në procesverbalin nr. 000393/24 të datës 06/03/2026 dhe në Raportin e Administratës Tatimore të Kosovës me ç’rast është konstatuar që Operatori Ekonomik “EX FIS “shpk, e ka tejkaluar Marzhën Tregtare maksimale të lejuar për shitje me shumicë për produktin të Dizel, Benzinë, i cili nuk e ka respektuar vendimin për rregullimin e çmimeve të caktuara. Veprim ky në kundërshtim me nenin 15 të Ligjit nr.08/L-018 Për Tregtinë me Produkte të Naftës dhe Karburanteve të Ripërtërishme, i sanksionuar me nenin 19 paragrafi 13 të po të njëjtit ligj dhe në nenin 26 të Ligjit nr. 06/034 Për Mbrojtjen e Konsumatorit dhe ndëshkohet me nenin 137 të po të njëjtit ligj”, thuhet në arsyetimin e kësaj kërkese për fillimin e procedurës kundërvajtëse.
Sanksionet e nenit 19, paragrafi 13
Për shkelje të vendimit për marzhën e fitimit maksimal, në kërkesë thuhet se sanksioni është paraparë me nenin 19, paragrafi 13 i Ligjit nr.08/L-018 për Tregtinë me Produkte të Naftës dhe Karburanteve të Ripërtëritshme.
Sipas paragrafit 13, dënimi maksimal për persona juridikë është i paraparë në shumën prej 6 mijë euro.
“Kushdo që, në kundërshtim me nenin 15 të këtij ligji, nuk respekton kufizimin e çmimit të produktit të naftës ose karburantit të ripërtëritshëm dënohet me gjobë prej dy mijë (2.000) deri në gjashtë mijë (6.000) euro, si person juridik”, thuhet në paragrafit 13 të nenit 19 të Ligjit nr.08/L-018.
Ndryshe, kompania EX FIS Sh.P.K. që merret me shitjen e derivateve të naftës me shumicë dhe pakicë është e themeluar në vitin 2005, ku 100% të aksioneve i zotëron biznesmeni Isa Muharremi.
LEXONI EDHE:
KEK-u nuk ndalet, i jep sërish tender me negocim donatorit të VV-së, “Ex Fis” të Isa Muharremit
Si përfunduan milionat e KEK-ut te donatori i VV-së, “Ex Fis”?
KEK-u i jep sërish 260 mijë euro me negocim donatorit të VV-së, “Ex Fis”
