Në Gjykatën Themelore në Prishtinë po mbahet seanca për caktimin e masës së sigurisë ndaj disa të dyshuarëve për kontrabandë me naftë dhe pastrim parash, të cilët u arrestuan gjatë aksionit të Prokurorisë Speciale të Kosovës më 1 korrik.
Veriu.info ka siguruar kërkesën për caktimin e masës për paraburgim të bërë nga Prokuroria Speciale në Gjykatën Themelore në Prishtinë, ku zbardhet skema e këtij grupi të strukturuar kriminal, që dyshohet për kontrabandë, shmangie tatimore e pastrim parash.
Në kërkesën për caktimin e masës së paraburgimit për nëntë të arrestuarit, implikim i rëndë rëndon edhe mbi të pandehurin nga Lipjani, Skender Kelmendi. Ai dyshohet për një varg veprash të rënda penale, duke përfshirë pjesëmarrjen në grup të organizuar kriminal, shpërlarjen e parave, dokumentet e rrejshme lidhur me tatimin, shmangien nga tatimi, falsifikimin e parave, si dhe mbajtjen në pronësi të paautorizuar të armëve.
Lexoni edhe:
Sipas dosjes së prokurorisë, Skender Kelmendi dhe Nisret Bajraktari, duke e ditur se pasuria e të pandehurve Faruk e Fariz Mazrek buron nga aktivitetet kriminale të trafikimit me narkotikë, u kanë ndihmuar vazhdimisht atyre për të kryer pastrimin e parave dhe fshehjen e origjinës së tyre.
“U kanë ndihmuar të njëjtëve që ta kryejnë pastrimin e parave të tilla, fshehjen e atyre aktiviteteve dhe burimit të vërtetë të pasurisë së tyre, si dhe ta bëjnë futjen e parave të tilla në sistemin bankar ashtu që të pandehurve Mazrek u kanë lëshuar fatura fiktive kinse për blerjen e derivateve të naftës nga biznesi i tyre ‘PO PETROLL FARIZ’ në fshatin Mamushë, edhe pse kjo nuk ka qenë e vërtetë, çka dëshmohet edhe me transkriptat e bisedave të tyre të dt. 14 dhe 15 Qershor 2024”, thuhet në dosjen e prokurorisë për këta të pandehur.
Përveç përfshirjes në skemën e faturave fiktive e cila i shkaktoi dëm të madh ATK-së, Skender Kelmendi dyshohet edhe për falsifikim parash dhe armëmbajtje pa leje. Gjatë bastisjes së datës 1 korrik 2026, Kelmendit i janë gjetur në posedim tri armë zjarri pa leje (dy prej tyre me leje të skaduara në vitin 2024).
Pronarit të pompës së derivateve “Eurokos Petrol” Sh.P.K., Skender Kelmendi, me rastin e arrestimit i janë gjetur në pompën e tij 298 euro në monedha metalike nga 2 euro të falsifikuara, që dyshohet se ka pasur për qëllim që t’i vë në qarkullim si të vërteta, duke kryer kështu veprën penale të falsifikimit të parasë.
LEXONI EDHE:
