Veprimtaria biznesore e naftarëve të Kosovës po del të jetë një problem serioz për shtetin dhe konsumatorët, pasi që shumë prej tyre po zbulohen duke punuar ilegalisht, abuzuar me çmime e duke u marrë me kontrabandë.
Veriu.info ka siguruar dokumente zyrtare të Ministrisë së Tregtisë që dëshmojnë se njësia “Arbëria Petrol” e kompanisë “Arbëria Turist” Sh.P.K. me pronar Afrim Balaj, me seli në Suharekë, është zënë duke punuar ilegalisht.
Inspektorët e Inspektoratit të Tregut të Ministrisë së Tregtisë më 5 janar 2026 kishin zbarkuar për inspektim në pompën e derivateve të naftës “Arbëria Petrol” në Prizren, ku kishin konstatuar se kompania nuk ka leje për ushtrimin e veprimtarisë së shitjes së naftës.
Çuditërisht inspektorët e tregut nuk e kishin mbyllur këtë pompë të derivateve që operonte pa leje të ushtrimit të veprimtarisë, të cilët i kishin dhënë 30 ditë afat të prezantojë lejen, raporton Veriu.info.
Pasi që kompania kishte dështuar në prezantimin e dokumentacionit që ka leje për ushtrim të veprimtarisë, prapë inspektorati i tregut e ka lejuar të operojë kundërligjshëm, duke mjaftuar me nisjen e procedurës kundërvajtëse më 18 shkurt pranë Gjykatës Themelore në Prizren.
“Pala prezente nuk ka arritë te prezentoj dokumentin e kërkuar ku i është dhënë afat prej 30 ditësh të prezantoj dokumentacionin përkatës të ushtrimit të veprimtarisë për shitje me pakicë e NDN-së, edhe pas këtij afati subjekti Ekonomik “Arbëria Petrol” sh.p.k, nuk ka prezantuar dokumentacionin e kërkuar nga Inspektorët e Tregut me procesverbal, brenda afatit ligjor. Operatori Ekonomik “Arbëria Petrol” sh.p.k nuk posedon Leje për Ushtrimin e Veprimtarisë Afariste, për çka ka qenë i obliguar me nenin 6 të Ligjit Nr.08/L-018 “Për tregtinë me produkte të naftës dhe karburanteve të ripërtërishme” të gjitha subjektet që merren me veprimtari të produkteve të naftës ose karburanteve të ripërtërishme, duhen të pajisen me leje të vlefshme, një veprim i tillë ndëshkohet sipas nenit 19 paragrafi 2 të Ligjit Nr.08/L-018 “Për tregtinë me produkte të naftës dhe karburanteve të ripërtërishme””, thuhet në arsyetimin e kërkesës kundërvajtëse të Inspektoratit Qendror të Mbikëqyrjes së Tregut.
Amatorizmi profesional i Inspektorëve të IQMT-së
Në rreshtin e parë të kërkesës për fillimin e procedurës kundërvajtëse, IQMT i Ministrisë së Tregtisë e ka shkruar gabimisht numrin unik identifikues të këtij biznesi, përmirësim të cilin pastaj e ka bërë në fillim të arsyetimit.
Gabim amator inspektorët e tregut kanë bërë edhe me rastin e evidentimit të emrit të kompanisë, të cilës në gjithë dokumentet i referohen si “Arbëria Petrol” Sh.P.K., por që në fakt një kompani e tillë nuk ekziston në Kosovë. Kjo ngase inspektorët e tregut nuk kanë qenë në gjendje të dallojnë njësinë biznesore prej kompanisë.
“Arbëria Petrol” nuk është kompani, por është njësi me numër 5089433 e kompanisë “Arbëria Turist” Sh.P.K. me pronar Afrim Balaj dhe si e tillë nuk ka subjektivitet juridik.
Ndoshta ‘gabimi’ mund të jetë bërë qëllimshëm, që pastaj IQMT ta humbë rastin pranë Gjykatës Themelore në Prizren!
Nga një kërkim i thjeshtë në Facebook te historia e kompanisë, shihet se “Arberia Petrol” funksionon të paktën që nga viti 2015./Veriu.info
LEXONI EDHE:
