Presidenti i Shteteve të Bashkuara të Amerikës, Donal Trump, është takuar me kancelarin gjerman, Friedrich Merz, ku ky i fundit, në fillim të takimit ia dhuroi presidentit amerikan certifikatën e lindjes së gjyshit të Trump, i cili ishte gjerman.
Për këtë, ka raportuar edhe Sky News, ku korrespondenti i tyre amerikan Mark Stone, ka dhënë një pasqyrë mbi rrënjët gjermane të Donald Trump-it.
Shpesh flitet për lidhjet e Donald Trump-it me Skocinë – përmes nënës së tij, Mary Anne MacLeod Trump, e cila ka lindur në Tong, një fshat i vogël në Ishullin Lewis në Hebridat e Jashtme.
Por lidhjet e tij me Gjermaninë janë më të thella. Të dy gjyshërit e tij nga ana e babait ishin gjermanë.
Fredrich dhe Elizabeth Trump kanë lindur në Kallstadt, një fshat i vogël në rajonin e Palatinatit në Gjermani, në jugperëndim të Frankfurtit.
Jeta e tyre pasqyron një histori klasike amerikane nga varfëria në pasuri. Fredrich emigroi në Nju Jork dhe më pas në Siatel në vitin 1885, ku u përfshi në biznesin e pasurive të patundshme dhe në industrinë e restoranteve.
Hulumtimet tregojnë se ai kishte marrë me qira dhe drejtonte një restorant me bar dhe madje një bordello pranë. ‘Poodle Dog’ reklamonte “dhoma private për zonja”.
Ai u kthye në Gjermani në vitin 1901, ku u martua me Elizabeth Christ. Çifti më pas u kthye në Nju Jork, ku u vendosën. Ata patën dy fëmijë, John dhe Fred, i cili ishte babai i Donald Trump-it.
Presidenti Trump nuk e ka takuar kurrë gjyshin e tij. Fredrich vdiq në Queens në vitin 1918, vetëm 49 vjeç. Por ai e njohu gjyshen e tij gjermane para vdekjes së saj në vitin 1966. Ajo mori përsipër pronën familjare dhe zhvilloi biznesin, duke ndihmuar në themelimin e asaj që do të bëhej perandoria e pasurive të patundshme të Trump-it.
Trump nuk e ka vizituar kurrë shtëpinë e tij të stërgjyshërve në Gjermani.
