Industria e shitjes së naftës në Kosovë mbetet ndër më të fuqishme dhe profitabilet. Por njëkohësisht pronarët e pompave të derivateve janë të njohur për dallevere me çmime e licenca dhe cilësi të dobët të naftës.
Në kuadër të hulumtimit për kompanitë e derivateve të naftës që kanë abuzuar me çmime kundërligjshëm në kohë krize dhe kanë operuar pa leje pune (licenca), Veriu.info ka gjetur se probleme ligjore ka edhe një ish zëvendës-ministër dhe ish kandidat për deputet. Fjala është për pronarin e “Besimi Group” Sh.P.K., Hyzer Gashi.
Inspektorët e Inspektoratit Qendror të Mbikëqyrjes së Tregut të Ministrisë së Tregtisë, në janar kishin inspektuar një pompë të derivateve të naftës të “Besimi Group” Sh.P.K në Shtime, ku kishin konstatuar se e njëjta operon pa leje për ushtrimin e veprimtarisë.
Në bazë të të gjeturave që janë evidentuar në procesverbalin e datës 14 janar 2026, IQMT më 25 shkurt 2026 ka filluar procedurë kundërvajtëse në Gjykatën Themelore Ferizaj ndaj kompanisë “Besimi Group” Sh.P.K të Hyzer Gashit.
Inspektorët në arsyetimin e kërkesës së dërguar në Gjykatë, kanë bërë të ditur se “Besimi Group” Sh.P.K e kapur duke ushtruar veprimtarinë e shitjes së derivateve të naftës pa leje pune.
Po ashtu, inspektorët kanë theksuar faktin se “Besimi Group” Sh.P.K e Hyzer Gashit edhe 30 ditë pas inspektimit nuk e ka prezantuar dokumentacionin e lejes për shitje me pakicë të dizelit dhe benzinës.
Mirëpo, është i çuditshëm fakti se si inspektorët e tregut e kanë lejuar kompaninë “Besimi Group” Sh.P.K të vazhdojë të shes derivate të naftës pa licencë!?
Kush është “Besimi Group” Sh.P.K?
“Besimi Group” Sh.P.K. është e themeluar në dhjetor 2025 nga Hyzer Gashi, i cili zotëron 100% të aksioneve.
Aktivitet primar i kësaj kompanie në ARBK është tregtia me shumicë e drurit, materialeve të ndërtimit dhe pajisjeve hidrosanitare, përderisa si aktivitet sekondar ka të regjistruar përpunimin e lëngut të frutave dhe perimeve.
Edhe pse ka mbi 60 aktivitete tjera të regjistruara në ARBK, “Besimi Group” Sh.P.K në asnjërin prej tyre nuk e ka të përfshirë shitjen e derivateve të naftës.
Kush është Hyzer Gashi?
Pronari i “Besimi Group” Sh.P.K., në opinionin publik njihet edhe si politikan, pasi që në vitin 2019 ishte emëruar zëvendës-ministër i Ministrisë së Financave nga ish Kryeministri Ramush Haradinaj.
Hyzer Gashi në zgjedhjet parlamentare të vitit 2019 ka kandiduar për deputet nga NISMA, ku kishte arritur të marrë vetëm 1244 vota.
Pronari i “Besimi Group” Sh.P.K është aktualisht kryetar i Odës Ekonomike Shqiptar, një OJQ e themeluar në janar të vitit 2025.
Hyzer Gashi në ARBK rezulton të jetë bashkëpronarë me 25% të aksioneve edhe në Besimi Commerce, por që nga kjo kompani kanë thënë për Veriu.info se ai nuk është më aksionar prej disa muajsh, por që, sipas tyre, të dhënat në ARBK nuk janë përditësuar akoma.
Veriu.info ka dërguar pyetje në “Besimi Group” Sh.P.K. për të marrë qendrimin e tyre për gjetjet gjatë inspektimit të Inspektorëve të Tregut, por që nuk kemi pranuar përgjigje.
LEXONI EDHE:
Dallavere me çmimet e naftës: Lab Oil i Raif Gashit përfundon në gjykatë (Dokument)
